Azərbaycan, Gürcüstan, Bolqarıstan və Türkiyə təmiz enerji sazişi imzalayacaqAzərbaycan, Gürcüstan, Türkiyə və Bolqarıstan arasında yaşıl elektrik enerjisinin ötürülməsi və ticarəti üzrə hökumətlərarası sazişin imzalanması planlaşdırılır.
1business.media xəbər verir ki, sazişin Türkiyənin Antalya şəhərində keçiriləcək COP31 beynəlxalq iqlim konfransı çərçivəsində imzalanması nəzərdə tutulur.
Türkiyənin energetika və təbii sərvətlər naziri Alparslan Bayraktar layihənin regional enerji əməkdaşlığı baxımından strateji əhəmiyyət daşıdığını bildirib.
Elektrik enerjisi Avropaya ötürüləcək
Layihənin əsas məqsədi Azərbaycanda istehsal olunan bərpaolunan enerjinin Gürcüstan və Türkiyə üzərindən Bolqarıstana, oradan isə Avropa bazarlarına çatdırılmasıdır.
İlkin mərhələdə elektrik enerjisinin ötürülməsi gücünün 1 giqavat olması nəzərdə tutulur.
Azərbaycanın enerji ixracı imkanları genişlənəcək
Layihə həyata keçirilərsə, Azərbaycanın külək və günəş enerjisi potensialından daha geniş istifadə olunacaq. Yeni elektrik bağlantıları regionda enerji təhlükəsizliyinin gücləndirilməsinə və Avropa bazarına ixrac imkanlarının artırılmasına şərait yarada bilər.
Dörd ölkə arasında yaşıl elektrik enerjisinin ötürülməsi və ticarəti üzrə əməkdaşlıq memorandumu 2025-ci il aprelin 4-də Bakıda imzalanıb.
