Dövlət qurumlarının avtomobilləri hərraca çıxarılır – Qiymətlər 400 manatdan başlayır1business.media xəbər verir ki, Azərbaycanda dövlət qurumlarının balansında olan 12 nəqliyyat vasitəsi hərrac yolu ilə satışa çıxarılacaq.
Əmlak Məsələləri Dövlət Xidməti tərəfindən təşkil ediləcək hərrac 8 dekabr 2026-cı il tarixində saat 10:00-da keçiriləcək.
Satışa təqdim olunan avtomobillər arasında “Peugeot”, “Nissan”, “Mitsubishi”, “Hyundai”, “Volkswagen”, “QAZ” və “VAZ” markalı nəqliyyat vasitələri var.
Avtomobillərin başlanğıc qiymətləri 400 manatdan 9 360 manatadək dəyişir.
Ən ucuz avtomobil 1986-cı il buraxılışlı VAZ-21013 modelidir. Onun ilkin satış qiyməti 400 manat müəyyən edilib. 1990-cı il buraxılışlı VAZ-21061 avtomobili isə 500 manata təklif olunur.
Hərracda daha yüksək qiymətə təqdim edilən avtomobillərdən biri 2008-ci il buraxılışlı Mitsubishi L200-dür. Onun başlanğıc qiyməti 9 360 manatdır. 2014-cü il buraxılışlı Volkswagen Passat isə 8 550 manata satışa çıxarılır.
Siyahıdakı ilk 8 avtomobil üçüncü dəfə 10 faiz endirimlə təkrar hərraca təqdim olunur. İştirak etmək istəyən şəxslər avtomobilin başlanğıc qiymətinin 10 faizi məbləğində beh ödəməlidirlər.
Satışa çıxarılan nəqliyyat vasitələri müxtəlif dövlət qurumlarının, o cümlədən Fövqəladə Hallar Nazirliyinin, Azərbaycan Standartlaşdırma İnstitutunun, Nazirlər Kabinetinin İşlər İdarəsinin və digər təşkilatların balansındadır.
Avtomobillər üzrə mövcud cərimə və məhdudiyyətlərin aradan qaldırılması balanssaxlayıcı qurumlar tərəfindən təmin ediləcək.
