Braziliyanın ən böyük özəl bankı kriptovalyutaya keçdi – 15 rəqəmsal aktiv
1business.media xəbər verir ki, Braziliyanın ən böyük özəl bankı Itaú Unibanco kriptovalyuta ticarəti və saxlanması xidmətlərini ölkənin Mərkəzi Bankında rəsmiləşdirib. Bank bu addımı yeni rəqəmsal aktiv qaydaları çərçivəsində atan ilk Braziliya bankı olub.
Bank oktyabrın 27-də tənzimləyiciyə bildiriş təqdim edib. Bununla Itaú Unibanco kriptovalyuta xidmətləri üzrə yeni tələblərə uyğunluğunu rəsmiləşdirib.
Itaú müştərilərinə 15 rəqəmsal aktiv üzrə əməliyyat imkanı yaradır. Siyahıya Bitcoin, Ethereum, Solana, XRP və USDC kimi kriptovalyutalar daxildir.
Bank kriptovalyuta xidmətlərini 2023-cü ilin dekabrından təqdim edir. Yeni qeydiyyat isə artıq mövcud olan xidmətlərin Braziliyada 2026-cı ildə qüvvəyə minən yeni tənzimləmə çərçivəsinə uyğunlaşdırılması deməkdir.
Yeni qaydalara əsasən, Mərkəzi Bank tərəfindən artıq lisenziyalaşdırılmış maliyyə qurumları kriptovalyuta xidmətləri üçün bildiriş prosedurundan istifadə edə bilər. İxtisaslaşmış kriptovalyuta şirkətləri isə ayrıca fəaliyyət icazəsi almalıdır.
Itaú-nun ticarət və saxlanma xidmətləri yeni qaydalarda virtual aktivlərin broker xidməti kateqoriyasına daxil edilir. Bankın müştərilərinin sayı və kriptovalyuta əməliyyatlarının ümumi həcmi isə açıqlanmayıb.
Braziliya Mərkəzi Bankının yeni tələblərinə əsasən, kriptovalyuta xidmətləri göstərən maliyyə qurumları müstəqil texniki sertifikat təqdim etməlidir. Tələblərə cavab verməyən qurumlar isə xidmətlərini dayandırmalı ola bilər.
