Tikinti sektorunda ikiqat mənfi siqnal

Tikinti sektorunda ikiqat mənfi siqnal

1business.media xəbər verir ki, 2026-cı ilin sentyabrında Azərbaycanda tikinti sektorunun inam indeksi mənfi 40,4 bəndə düşüb. Bu, ilin ən aşağı göstəricisidir. Avqustda indeks mənfi 32,3 bənd olub.

Mərkəzi Bankın məlumatına görə, tikinti müəssisələrində son üç ayda icraya qəbul edilmiş sifarişlər üzrə göstərici mənfi 52,2 bənddən mənfi 60,7 bəndə enib. Ötən ilin sentyabrında bu göstərici mənfi 7,9 bənd təşkil edib.

Növbəti üç ay üzrə işçilərin sayının dəyişməsi ilə bağlı gözləntilər də pisləşib. Göstərici avqustdakı mənfi 12,4 bənddən sentyabrda mənfi 20,2 bəndə düşüb.

Tikinti işlərinin son üç aydakı həcmini əks etdirən göstərici də avqustdakı 1 bənddən mənfi 3,6 bəndə geriləyib. 2025-ci ilin sentyabrında bu göstərici 15,5 bənd olub.

Tikinti sektoru sentyabrda əsas iqtisadi sahələr arasında mənfi inam indeksinin qeydə alındığı yeganə sektor olub. Həmin ay sənayedə inam indeksi 13 bənd, xidmət sektorunda 17,6 bənd, pərakəndə ticarətdə isə 17,9 bənd təşkil edib.

Tikinti sektoruna kreditlər 56 faiz artıb

Tikinti sektoruna kreditlər 56 faiz artıb

1business.media xəbər verir ki, Azərbaycanda tikinti və inşaat sektoruna yönəldilən kreditlərin həcmi son bir ildə 56,3 faiz artıb.

2026-cı il sentyabrın 30-na sektor üzrə ümumi kredit portfeli 2 milyard 843,6 milyon manat təşkil edib. Bunun 2 milyard 426,4 milyon manatı bankların, 417,2 milyon manatı isə qeyri-bank kredit təşkilatlarının payına düşüb.

Avqustla müqayisədə sentyabrda kredit portfeli 223,9 milyon manat və ya 8,5 faiz artıb. 2025-ci ilin sentyabrında isə bu göstərici 1 milyard 819,8 milyon manat olub.

Sökülən evlərə verilən kompensasiya dəyişə bilər

1business.media xəbər verir ki, sökülən ev və obyektlərə görə kompensasiyanın hesablanması üçün vahid və açıq meyarların müəyyənləşdirilməsi təklif olunub.

Təkliflə Milli Məclisin İnsan hüquqları komitəsinin sədri Zahid Oruc parlamentin iclasında çıxış edib. O bildirib ki, qanunvericilikdəki boşluqlar və qeyri-müəyyənlik kompensasiya mübahisələrinə, mülkiyyət hüquqları ilə bağlı problemlərə və tikinti layihələrinin uzanmasına səbəb olur.

Təklifə əsasən, Nazirlər Kabineti tərəfindən qiymətləndirmə şkalası, bazar qiymətlərinin tətbiqi qaydası, ərazilər üzrə fərqli tariflər və inflyasiya ilə tikinti xərclərində dəyişiklik olduqda kompensasiyanın yenilənməsi mexanizmi müəyyən edilməlidir.

Sökülən əmlakın əvəzinə veriləcək mənzilin sahəsi, otaq sayı, yaşayış və qeyri-yaşayış sahələrinin fərqi, yeni mənzilin keyfiyyəti və təhvil müddətinin də qanunvericilikdə dəqiq göstərilməsi təklif olunur.

Zahid Oruc faktiki sahənin ölçülməsi məsələsinə də diqqət çəkib. Balkon, zirzəmi, yardımçı otaq, eyvan, hasar və sonradan artırılmış hissələrin ayrıca qiymətləndirilməsi, müstəqil ölçmə və elektron aktlaşdırma mexanizmlərinin tətbiqi təklif edilir.

Komitə sədrinin sözlərinə görə, evin və ya obyektin dəyəri ilə yerləşdiyi torpağın dəyərinin hesablanması da şəffaf qaydalarla tənzimlənməlidir.