Kvant kompüterləri üçün proqramlaşdırmanı sadələşdirən startapa investisiya

Almaniyanın “RhymeQ” startapı ilkin mərhələdə 2,2 milyon dollar investisiya cəlb edib.

1business.media Vestbee-yə istinadən xəbər verir ki, raunda “Ground State Ventures” rəhbərlik edib.

Şirkət adi proqramlaşdırma bilikləri olan mütəxəssislərin kvant kompüterləri üçün proqram hazırlamasını asanlaşdıran platforma yaradır. Yeni vəsait mühəndis komandasının genişləndirilməsinə, məhsulun inkişafına və kvant avadanlığı istehsalçıları ilə əməkdaşlığa yönəldiləcək.

İnternet trafikini qoruyan şirkət 100 milyon dollar toplayıb

Estoniya ilə əlaqəli texnologiya şirkəti “Blackwall” C seriyası raundunda 100 milyon dollar investisiya cəlb edib. Şirkətin qiymətləndirilməsi 2,2 milyard dollardır.

1business.media Tech.eu-ya istinadən xəbər verir ki, raunda “AVP” rəhbərlik edib.

“Blackwall” hosting və bulud xidmətləri təminatçılarına zərərli botları, hücumları və trafikdən sui-istifadəni aşkarlamağa kömək edir. Yeni maliyyə beynəlxalq fəaliyyətin və platformanın genişləndirilməsinə yönəldiləcək.

Zavodlarda robotların tətbiqinə 50 milyon dollarlıq maliyyə

ABŞ-nin “Formic” şirkəti sənayedə süni intellektlə işləyən robotların tətbiqini genişləndirmək üçün 50 milyon dollar maliyyələşmə cəlb edib.

1business.media şirkətin açıqlamasına istinadən xəbər verir ki, məbləğə həm investisiya, həm də borc maliyyələşməsi daxildir. İnvestisiya raunduna “Mercato Partners” rəhbərlik edib.

“Formic” istehsalçılara aylıq ödəniş müqabilində robot avadanlığı, proqram təminatı və texniki xidmət təqdim edir.

Şirkətin məlumatına görə, onun robotları ABŞ-nin 30-dan çox ştatında fəaliyyət göstərərək ümumilikdə 750 min saatdan artıq istehsal təcrübəsi toplayıb.